Mamata-i Modi melena tangar ka nem PM inyakdaktsünür

New Delhi, January 6 (Agencies) : Prime Minister Narendra Modi-i sen tejen anenba maparen anema West Bengal Chief Minister Mamata Banerjee-i o jembia arur aser tanü lai “national government” ka tentettsü atema Narendra Modi-i menden toktsütsüla ta metetdaktsü.
BJP lennir tejen LK Advani mesüra Finance Minister Arun Jaitley mesüra Home Minister Rajnath Singh nungeri aniba sorkar ka tentettsüla, ta Mamata-i ashi.
Trinamool Congress züngsemtem ponzi oshimashi ken o nung tai tonglokja apuba atema Mamata-isa Tir Pranab Mukherjee dang “Narendra Modi ket nungi linük kümzüktsü atema tebang aitsü ayongzüker” ta ashi.
“Linük kümzüktsü atema Tir-i tiyongtsü nung mapa inyaktsüla. PM Modi-i linük maniteter. Pai PM menden toktsütsüla. Linük nung national government ka alitsüla” ta West Bengal chief minister-isa ashi.
November 8 nü sen tejentem anentsüba ajanga linük nung rongsenkettsüng tsütsü tetsükdaktsü kar ajurutsü akok ta Tir Pranab-i o jembiba sülen anogo ka lir külen, Mamata-i iba onük jembiogo.
Centre sorkari parnok den toktepertem anema kiralongra mapa inyaker. Centre-i sen 500 aser 1000 tejentem agienba ajanga West Bengal nung sen crore 5,500 akoksaogo, ta Mamata-isa ashi.
Sen tejen anentsüba anema lai nokdakba atema Centre-i CBI nem lar züngsemtem dak tenük yoka mapa inyakdaktsür, ta laisa aitsü.
Tawa tu Trinamool MLA tem- Tapas Pal aser Sudip Bandyopadhyay na “Rose Valley scam” nung tai tonglokja apu.
Bandyopadhyay apuba sülen nisung kari Hooghly nung aliba BJP office nung mi senoktsü aser BJP lennir Krishna Bhattacharya’er kidang bomb ka pokdaktsü.
Sen tejentem anentsüba anema lai mapa inyakba anendaktsütsü atema lar züngsemtem apu, ta Mamata-isa ashi.