Mamata-i Tripura nung ‘Ma-Mati-Manush’ sorkar shimtsü ajungshir

Agartala, August 9 (Agencies) : Mongulbarnü West Bengal Chief Minister aser Trinamool Congress nung tongti, Mamata Banerjee-i Tripura nung tang yimsü tesüdak Manik Sarkar-i aniba sorkari mapa takok mongutetba tuteta ashidang state nung ‘Ma-Mati-Manush’ sorkar shimtsü ajungshi.
State TMC-i ayongba mezüngbuba senden nung, CPI(M)-i mapang talangka yimsü asüba mapang Tripura nung terenlok kecha mali arur ta ashidang, laisa, “Manik babu (Tripura CM Manik Sarkar) nai tesüiba küm 23 nung state atema mozüki kadanga lapoktsü melapoktsü ? Na centre nungi noklang nung shilem 90 teyari angur. Bengal nungbo küm pongu tsüngda nung mozüki tajung 41 tashi amenokogo. CPI-M-i Tripura nung kechisa inyakteta lir ?” ta asüngdang.
Tripura nunga West Bengal nung aliba sorkar amai ka nüngdak, ta lai ashi.
“CPI-M-i iba yimsüsüba menden yutsütsü mapang tongogo. Parnok aludangtsütsü asoshi Bengal rangbeni nenok yaritsü. 2018 election nungbo CPI-M madak takok angutsüla,” ta laisa ashi.
Banerjee-i, state nung kaketshisatsü junga manguba den tashidak den raraba tsütsü kanga anünga lir aser ajakji yimsüsüba majungba ajanga lir, ta ashi.
Lai, Bengal nung sentsüh tebilemtsü tulu liaka jang seret nung senpak anana agi lemtsür aser tetsür shisaluyimertem nem stiphen agütsür, ta ashi.
“Tripura nung mapa, aluyimer atema teyari, university aser tesayurtem mali. Yangi ashikülak, mepetmesü aser yazü tenangzükba agi sünga lir. Anungji kechiba CPI-M nem vote agüja parnok shimtsü?” ta lai asüngdang.
Ano lai BJP majungba indang ashiba mapang, “BJP ya tagidak maka party ka lir aser parnoki kecha meinyakteter. TMC-i nungitba ajanga dang tan Parliament nunga GST bill agizüka ayu,” ta ashi.
Iba senden nung West Bengal nungi minister Firhad Hakim aser Arup Biswas, MP Mukul Roy aser Tripura nungi TMC lenir Sudip Roy Burman nungeria o jembi.
Ano lai BJP majungba indang ashiba mapang, “BJP ya tagidak maka party ka lir aser parnoki kecha meinyakteter. TMC-i nungitba ajanga dang tan Parliament nunga GST bill agizüka ayu,” ta ashi.
Iba senden nung West Bengal nungi minister Firhad Hakim aser Arup Biswas, MP Mukul Roy aser Tripura nungi TMC lenir Sudip Roy Burman nungeria o jembi.