Mamata rally nung PM mapa asoshi tetokteper 9 liasü; Shah

Kolkata, Aenjeti/January 22 (Agencies): BJP tir Amit Shah-i Mongolbarnü Trinamool Congress tekolakba Mamata Banerjee aser opposition den lai tesendaktep yanglutsü merangba aija, West Bengal nung par party Lok Sabha election atema nüboyimba sentong tenzüktsüogo.
“Lenir 20-25-i teka amtep nung Modi metsükdaktsütettsü, pa nisung crore aikati pusemdar,” ta pai ashi. Modi anema opposition lenirtem sentepba dak sendakba nung Shah-i ashiba agi, Honibarnü Kolkata nung Mamata Banerjee-i ayongzükba opposition party rally nung Ato Kilonser menden asoshi tokteptsüpur parnok teku liasü.
“Iba ya pei ajangzüktsü aser tashi atema lir. Parnoki (opposition lenirtem) Vande Mataram aser Bharat Mata ki Jai yimyim mayim,” ta paisa ashi.
BJP tekolakbai nüburtem dang par party atema vote agütsütsü asoshi mepeshiba den ozüng alema bendanger senoka aitba nokdangtsü asoshi meita atatsü ayongzük aser Citizenship Bill dak sendakba nung West Bengal chief minister tamendakdak jangja jangja metetdaktsütsü ashi. “Mamata Banerjee-i iba bill anema nokdaktsü kechiyong la vote atema dang bilemer,” ta pai ashi. Citizenship (Amendment) Bill yagi bangladesh, Pakistan aser Afghanistan nungi Hindu, Sikh, Christian, Parsi, Jain aser Buddhists nunger nem lisopur jenjang agütsütsü meranger.
State sorkari Bengal nunger sobaliba raksatsür ta shia, Amit Shah-i ashiba agi, 2019 Lok Sabha election ajanga ochi mashi Trinamool party puri maneni tashi abentsü mabentsü bendangtsü.
BJP tekolakbaisa, Bengal ya taoba mapang nungbo linük lenir liasü saka tangbo state tem rongnung tekübokba jenjang nung lir. “Bengal sorkar kübok mapa inyakertem Central sorkar kübok inyaker tem anguba DA shilem 49 dang angur. Sentem ya kongi ao,” ta asüngdangba den iba ya Mamata Banerjee-i aniba sorkar mapalir aser nüburtemi Left sorkar tajungba asü ta bilemer, ta ashi.
Amit Shah-i ashiba agi, Trinamool sorkari BJP renloka aoba tsübur aser iba yongji Bengal nung BJP indang rath yatras nokdangogo. “Administration anisaogo. Rath yatra atema kü helicopter anentsü temelaba magütsü. Mamata-i onok indang yatra tem nokdangtsü akok saka nüburtem mulungjang nungi BJP magintettsü,” ta paisa ashi.
Temzüng ozüng dak sendakba nung Bengal sorkari BJP “rath yatra” sentong akatsü tenokdangba agütsü. BJP puri okadak temelaba meshia ken o benoka liasü saka takok mangu. Ajisüaka Supreme Court-i lokti senden akatsü asoshibo BJP nem temelaba agütsüogo.
Malda nung Shah indang rall masü tsüngda BJP tekolakba indang helicopter anentsüba tesem dak sendakba nung Trinamool aser BJP tsüngda o agi raraa liasü.
District administration-i Hotel Golden Park opposite nung moapu nung chief minister Banerjee indang tayimtsü dena anena aliba tesem nung helicopter ka anentsü tamakoktsü asütsü ta metetdaktsüogo aser airport teyanglushidak asünung helicopter anentsü tamakoktsü asütsü ta shiogo.
Ajisüaka BJP local unit puri ashiba agi, state sorkaribo iba tesem ya amshidar. Union minister Ravi Shankar-ia banerjee aija ashiba agi, Shah indang helicopter anentsü asoshi lai tashi mashiyimi amshi.
Iba sülen Chief minister Banerjee-i ashiba agi, lar sorkari BJP tekolakba anentsü asoshi iba jila nung helipad ka amshitsü temelaba agütsüogo, kechiyong parnoki democracy dak amanger.
BJP puri February 8 tashi nung tongtibang lenir Shah, Ato Kilonser Narendra Modi, Rajnath Singh, Nitin Gadkari aser Yogi Adityanath densema Lok Sabha menden 42 prongla nung lokti senden akatsü sentong yanglua lir.
2019 Lok Sabha election atema Bengal ya BJP pur atema kanga tongtibang tesem ka lir aser parnoki menden 22 bo akoktsü nükjidong yur lir. Bengal nungi tang BJP candidate ana lir saka tang Trinamool Congress lenir tejentem aika parnok den adenba sülen parnok tashi taitba kümogo.