Mamata WB Chief Minister atema tenangzükba agiogo

Kolkata (West Bengal), May 27, 2016: Hokolbarnü Kolkata nung West Bengal Angh, Keshari Nath Tripathy-i ketdangsüa West Bengal Chief Minister, tanabenren inyaktsü atema Mamata Banerjee tenangzükba agidaktsüba noksa nung angur. Tawa agiba assembly election nung Banerjee lenisüba nung Trinamool Congress-i menden 211 tashi nung takok anguba ajanga lar party tanaben state sorkar tashii arur.

Kolkata (West Bengal), May 27 (Agencies): Hokolbarnü Kolkata yimti nung Mamata Banerjee West Bengal Chief Minister anabenren inyaktsü atema tenangzükba agiogo; lar ministry nung züngsem 42 alitsü.
Arishi küm 61 Banerjee nem state Angh, Keshri Nath Tripathi-i ketdangsüa tenangzükba agidakja liasü.
Lar ministry nung tejak tasenpur 18 lir.
Council of ministers nung tasenpurtemji- Suvendu Adhikari, Sobhandeb Chattopadhyay, Churamoni Mahato, Tapan Dasgupta, Asima Patra, Indranil Sen, Laxmi Ratan Shukla, Shyamal Santra, Golam Rabbani, Siddikullah Chowdhury, Abdur Rezzak Mollah, Jakir Hossain, James Kujur, Rabindra Nath Ghosh, Sandhyarani Tudu, Abani Joardar, Bachchu Hansda aser Sovan Chatterjee (Kolkata Mayor) nunger lir.
Tanü iba sentong nung Bhutan Ato kilonser, Tshering Tobgay, Bangladesh Industry Minister, Amir Hossain Amu, Union minister ana Arun Jaitley aser Babul Supriyo na, Delhi Chief Minister, Arvind Kejriwal, Uttar Pradesh Chief Minister, Akhilesh Yadav aser Rashtriya Janata Dal tongti lenir, Lalu Prasad nungera dena liasü.
Tanü kanga tatsük süaka Didi (Banerjee) CM tenangzükba agiba reprangtsü atema nisung merirjang aika sentepa liasü.
Banerjee mezüng 2011 küm May 20 nü chief minister atema tenangzükba agia liasü. Iba mapang nung Trinamool, Congress aser Socialist Unity Centre of India-Communist teloktep nung la tekolak liasü. Iba küm state assembly election nung lai aniba teloktepi Left Front-i küm 34 yimsüsüba sorkar atsüngtok.
Tawa agiba assembly election nung Banerjee lenisüba nung Trinamool-i menden 211 nguteta takok tulu angu.
Assembly züngsem 294 nungi Congress-Left Front teloktepi menden 77 dang angu. Bharatiya Janata Party (BJP) aser Gorkha Janmukti Morcha natia menden asemsem dang ngua liasü.