Mamit Deputy Commissioner agintsü khanga longkak ait

Aizwal, Rongjui/September 6 (Agencies): Tripura kübok Bru nunger relief camp tem nung voters list tanaben lepa reprangshiba sentong achaayanga inyakba atema Rasemnü Mizoram kübok Mamit district nung Mizo nunger lokti tentet balala aser political party balalai district deputy commissioner mapa nungi agintsü asoshi khanga longkak aitogo.
Mizoram NGO Coordination Committee aser political party ajaki senteper ayongzükba, longkak aitba sentong nung parnoki deputy commissioner Bhupesh Choudhary, Mamit district nungi Rongjui/Sept 10 matong tsüngda transfer yoktsü asoshi khangogo.
NGO Coordination Committee-i taoba mapang nung state adena or relief camp tem nung Mizoram nunger voters list lepa reprangshitsü benokba anemogo, aser iba voters list asadangba maparen ya refugee tem state-i meyipa aruba sülen inyaktsü asoshi khanga liasü.
Luroi/Aug 23 nü Mamit Election Officer Office-i auer atuba mapang Bru relief camp tem nungi kuli kakettem bendena aliba ajak auyarogo aser iba ken o bushisüngdangtsü atema Special Investigating Team (SIT) ka tentettsüogo. Iba ken o dak sendakba nung SIT-i tang tashi nung nisung 11 pua lir.
Election Commission of India’s Secretary SB Joshi aser under secretary Santosh Kumar Dubey nati Küptoknü election officer office nungi kuli kakettem auyar aoba asadangtsü asoshi Mamit jila semdangogo.
Poll panel team-ia district deputy commissioner, SP aser SIT züngsemtem den ajurutepa district administration aser police-i jenjang agiba tem asadanga liasü.