Mamta Kulkarni-i küm 16 sülen ola adoker

New Delhi, July 21, 2016 : Mamta Kulkarani-i la tobur ajung aser acting ajungba ajanga Bollywood silver screen nung küm ishika kanga nüngtugu süa aliba sülen küm 16 tashi temai madoki aliba, tang lai bilemba kar lemsatepogo.
Thane nung temesepba mozü amshiba/shibelenba ken o ka nung Mamta-a temesepba mozü amshir tettsüti Vicky Goswam den külemi aija lir ta osangbenertemi sangdonga liasü. Tesüiba mapang Vicky bo temesepba mozü shibelenba atema Dubai nung apu, ajisüaka 2013 küm chiokogo.
Aji oda süaka Mamta-i ABP News den jembiba mapang kanga indang indanga item osangtem aitsüogo.
Osangbenertem den jembiba mapang actress lai temesepba mozü amshiba/shibelenba osang aitsüba dang masü saka la küm 16 tashi tanela nung asüngsashiba otsü talangka atonga liasü.
Lai Bollywood toktsüba sülen küm ishika tejakdang shi aser tanela nung asüngsashiba indang lemsatep.
Lai, joko lokti nung ajaki meteta shilem agia ngütugu akümba mesapur saka ochi nung amiter süngjem süngjema alitsü ta ashiba mapang ni Vicky den kibong kümogo ta asüba osangji tiyazü lir, ta shisem.
Tangari ashishia mapang talangka aliba sülen Mamta-i la tai maliba kuli sayutsü atema ABP osangbenertem dang la meyong bank statement aser passport ajak sayuogo.
Mamta-i ”Autobiography of a yogini” kaket zülua sayaogo. Iba kaket nung la taküm nung ajangshiba aser tanela nung asüngsashiba ostü tejangja zülua lir.