Man Vs Wild nung PM Modi-i shilem agitsü

Chiteni/July 29, 2019 (Agencies): India Ato Kilonser Narendra nüngtugu TV show Man vs Wild nung shilem agiba angutsü. Iba show host Bear Grylls-i iba osang Twitter ajanga Hombarnü metetdakja liasü.
Pa show indang clip ka den yamai zülur post asü. “Linük 180 nung aliba nüburtemi PM @narendramodi yimya mejangjai aliba kar angutsü. Pa arem shiruru wazüka ayutsüba aser tzü mopung melenshiba dak sendakba nung nüburtem nem tangazükba agütsütsü asoshi India nung aremin sema aoba angutsü. @DiscoveryIN nung August 12 nü aonung 9:00 ako nung PM Modi den Man Vs Wild tangokba reprangang.”
Modi-i media kanga sapua amshir aser lanurtem den sendakteptsü asoshi lenmang tasen bushiteta arudar.
“Küm aika ni arem aser tenem nung lia aruogo. Item kümtem ajanga kü taküm nung kanga kongshiogo. Anungji yimden yimsüsüa adener sentong ka nung shilem agitsü asoshi asüngdangba ni kanga jangradaktsü aser shilem aginüa aküm,” ta Modi-i ashiba show yanglurtemi metetdaktsü.
Paisa, “iba show ta kü atemabo alima dang India environmental heritage sayutsü asoshi maongka tajung ka lir aser iba den tzümopung wazüka ayutsüba aser aitem den tesunep nung alitsü asoshi nenshitsü asoshi maongka tajung lir. Arem nung ano tanaben mapang jangredema indokogo aser tangbo Bear den iba mapang indokogo, shiba nem alima tzü mopung aser arem shiruru den sendakteptsü asoshi tashi balaka agüja lir,” ta ashi.
Iba episode indang jembidang Bear Grylls-i ashiba agi, “India Ato kilonser India nung arem sema anir senzütsü asoshi maongka anguba atema kanga pelar aser alima lenir ka den mapang indoktsü maongka anguba ya kü asoshi tetushi ulura. Arem shiruru ajanga asenok kati ka nüngdaker ta tali jangajadaktsür. Ni PM den mapang indoktsü aser linük ka lenir tali tejangjaba metettsü yongyaa atar.”
Iba show ya host Bear Grylls-i shiruru aser süngdonglidong meimba aser tensa tia balala nung taküm kümzüka ayutsü tasa balala amshia sayuba ajanga kanga nüngtugu ulur. 45-second teaser video nung Modi, alima nung democracy linük tulutiba lenir ka ta metetpelatsür.
Video nungsa Modi-i Grylls India-i pelashishia agizükba angutsü aser ano Modi kümzüka ayutsü atema Grylls-i jacket ka agütsüba angutsü.