Manchester nung bomb pokloktsüba ya Islamic State temi inyak ta sangdongogo

Hombar nikongdang Ariana Grande indang concert nung bomb pokloktsüba sülen Manchester Arena telung nung nisung yirur aliba noksa nung angur.

Manchester, May 23 (Agencies): Hombar aonung Manchester nung Concert ka nung bomb pokloktsüba mapang tanur densema nisung 22 asü aser nisung 59 yiruba lendong ya Islamic State (IS) teloki inyak, ta sangdongogo.
“Caliph atema rarar kati nisung aika atenshia aliba tesem nung bomb pokloktsü,” ta iba kiralongrar telok ajanga social media nung inoktsü aser anu maneni amaktsü, ta amokmeren.
Iba lendong adalokba dak sendakba nung arishi küm 23 tain tebur ka South Manchester nung pua lir, ta British police ajanga ashi.
Iba lendong adaloktsü ghonga ka agi jelia lia ISIS busemer südi ta temolung melemtetba nisung kar-i iba lendong indang Tweeter nung metetdaktsü, ta osang ajanga ashi.
Nüngtugu kentener, US tsür, Ariana Grande-i nisung 21,000 asemtsüsa Northwestern England nung aliba Manchester Arena nung concert agütsüba atemdang iba bomb pokloktsü aser iba tesem nungi kentener saburtem lanur aika tetsübu nung jenshi.
Aonung 10:33 ako meta nisung kari iba lendong adalokba osang agütsütsü asoshi police dangi call asü, ta yimti nung ketdangsertemi ashi.
Iba bomb ya stadium telungi aiba anasa apok, ta police temi ashi.
Iba stadium telungi aiba lenmang anasa ya Victoria train station lir aser iba tesem ya yimti nung senzüsempongba lenmang tiyong lir. Iba tesem ya Mongulbarnü anüngdang 12:00 ako tashi shibanga ayu.
Iba lendong adalokba sülen ambulance 60 iba tesemi ao aser yirur alirtem ya yimti nung aliba mozükitem nung anepaluba mapang lir.
“Nisung molungjang maliba kiralongrar temi pei kümzüka alitsü memetetba lanurtem dak rangloktsür iba lendong agütsüogo,” ta Downing Street nungi England Ato Kelonser, Theresa May-i sangdong.
Nisungtemi kinungertem samar mangu aliba bushitsü asoshi social media balala nung telok balala tenteta pei kinungertem bushitepba mapang lir.
Yimden yimsüsürtem election nübuyim anena lir aser Ato Kelonser, Theresa May-i anir sorkar ajungben senden ka mener iba lendong adalokba tesem semdang tenzükogo.
Alima nung lenirtemi iba lendong aitsüogo aser England chubatsür, Elizabeth II-ia iba lendong aitsüogo.