Manchester United-i FA Cup benogo

London, May 22 (Agencies) : Asaya temer kasasa asüba ajanga mapang talila asayadaktsüba mapang Jesse Lingard-i goal ka yokba ajanga Manchester United-i Crystal Palace madak takok ngua FA cup benogo.
Manchester United-i 2004 küm FA Cup abenba sülenbo tan ya mezüng iba marok abenerba lir.
“Tan iba marok anguba ya ni aser ozü club purtem atema kanga junger kechiba süra iba takok ya dena ni joko iba cup ya linük pezübuba nung angur,” ta Van Gaal-i ashi.
Asayar ter dang süaka onoki Mongubarnüa Bournemouth madak 3-1 agi takok angu aser tanüa Chris Smalling red card ngur tuguba ajanga nisung teri dang tatem tonga asayaa iba takok bener aruogo.
“Onoki temulung ajak bendanga agütsür asaya. Tan final asaya nung kanga jangratema asayaogo. Manchester United-ia yamaji kanga junga asaya aser kasasa asüba ajanga mapang talila agütsür asaya,” ta Crystal Palace manager Alan Pardew-i asayatemer külen ashi.