Mandeep Asian Boxing Championships pre-quarter-i iogo

Bangkok, August 28 (Agencies): India nunger tsüngteper, Mandeep Jangra-i Vietnam nunger Vien Ngoc madak takok anguba sülen tang tasayadak Asian Boxing Championship tebur temang touzük seret 69 taret welterweight shilem indang pre-quarterfinal asayatsü jenjang tanü Hokolbar nü nugogo.
Commonwealth Games nung silver medal agizüksang, Mandeep-i tanü minute ka shi nung points 3-0 ngua takokbaji angu.
Mandeep-i pa teka achijileni Huynh tenük abelen kübok tejak yiruja tsüngoktsüba yong Huynh-i metsüngteptettsüsüa küma tanü asayaji ano jungi tembangtsüsa aküm.
“Mandeep-i asaya tenzükba mapang nungi temaba jenjang nung tsüngtep saka tia makai Huynh memeteti yirutsü. Ajisüaka, Mandeep-i tanü points timba ngua takok angu,” ta India national coach, Gurbax Singh Sandhu-i tesülen metetdaktsü.
Mandeep-i Japan nunger Ysauhiro Suzuki den tan August ita 30 nü pre-quarterfinal asayatsü lemzükogo.
Ano külen, taoba Asian Games silver medal agizüker, India nunger Manpreet Singh-ia temang touzük seret 91 taret shilem indang 1 buba round Sri Lanka nunger Nuvan Sugeewa Sampath den tsüngtepa asüng, Honibar nü asayatsü renema lir.
Alima linük 28 nungi tsüngteper ajak agi 188 tashi iba asayamong nung shilem agiba osanga jangjaogo.