Maneka Gandhi-i Ganesh Joshi BJP nungi agientsü akhanger

New Delhi, March 16 (Agencies): Uttrakhand nung kor ka dak azükba atema BJP MLA, Ganesh Joshi anema ken o benokba sülen anogo ka lir Women & Child development Union minister aser shiruru temeten atema inyaker, Maneka Gandhi-i Joshi party nungi agientsü takhangba agütsüogo.
Joshi-i kor dak azükba video anguba sülen Maneka Gandhi-i, Joshi-i party atema tenüngmenük bener arutsüogo, ta ashi.
Laisa, Joshi nem temerenshi agütsütsü atema lai party bangdak lenirtem dang mepishitsü ta jembiba CNN-IBN osang ajanga metetdaktsü.
Ajisüaka Joshi-ibo, iba osangji tai, pai kor dak masü saka ali nungang azük ta ashi.
Paisa, iba kor jagi BJP nung inyaker ka yiruja ICU nung mongdar, ta ashi.
State nung BJP pur lungkak aitdang Mussoorie MLA, Joshi-i ajok kati police meyong kor dakji azük ta tai tonglokja lir. Iba tatalokba sülen pai kor dak azükba noksa aser video ji social media nung prokshia liasü.
Iba dak sentakba nung osangbenertem den jembidang Union minister, Rajiv Pratap Rudy-i, “Party-i iba tatalokba indangji meteta lir. Iba tatalokbaji party-i süoki ia agir,” ta shiogo.
Iba ama yimyaji tagizüktettsüla ka masü, ta Union minister-isa ashi.