Maneka-i Assam nung national nutrition scheme akangshitsü nangzük

Guwahati, April 21 (Agencies) : Union Women & Child Development minister, Maneka Gandhi-i Assam nung national nutrition scheme takok ngua inyaktsü nangzükogo.
Brihostibarnü Maneka-i Assam Chief Minister, Sarbananda Sonowal den ajurutepa senden amendang iba tenangzükba agi.
“Ozü sorkari state nung tetsür aser tanurtem nem chiyungtsü tajung chidaktsütsü atema nutritional food sachets scheme takok ngua inyaktsü nangzüka lir” ta Sonowal-i school aser Anganwadi centre tem nung chiyungtsü agütsüba indang onük lemsatepdang ashi.
Iba scheme ya state ajungalen tenzüka inyakba sülen, chiyungtsü agi meperiba indang onük samatsü, ta paisa Maneka dang ashi.
Assam Chief Minister aser Maneka nati tetsür aser tanurtem adenshiba school aser tanga centre tem nung tetsür aser tanurtem nem nutritional food sachets agütsüba maparen akangshitsü atema tebilembatem lemsatep.
Maneka-isa, Assam sorkari national parks aser tanga wildlife sanctuary tem nung güntok aser tanga sama aotsü ana nung aliba shirurutem kümzüka ayutsü atema inyakba mapa atema tenüngsang agütsü.
Sonowal aser Maneka natisa Assam nung ‘Animal Welfare Board’ ka tentettsü atema onüktem lemsatep aser idangji Sonowal-i “state nung iba board tentettsü atema sentong renemdar” ta metetdakja liasü.