Mangatettep aliba film ‘Udta Punjab’ sayaogo

New Delhi, June 17 (Agencies): Tesüiba hopta ishika mangatettep onük adoka aliba film, ‘Udta Punjab’ tanü (June 17, 2016) sayaogo.

Censor board chief, Pahlaj Nihalani-i, “Film sayaba yimyaji jangratemtsüka liasü. Film distributors aser producer temi takok angutsü ni imlatsür,” ta ashi.

Punjab nung temesepba mozü tebilemtsü onük nung ajemdaker yangluba thriller film nung shilem 89 intoktsü atema Censor board-i tuyua liasü. Brihostibarnü NGO kati iba film anema mepishiba court-i magizük, aser tanü iba film sayaogo.

Iba film nung tesem aika yanglushitsü tuyuba magizüki ‘Udta Punjab’ film producer temi Bombay High Court nung ken o ka agütsüba sülen court-i iba film nung natzü anaba noksa intoktsü aser disclaimer asem enoksemtsü tuyua iba film sayatsü temelaba agütsü.

Censor Board-i ‘Udta Punjab’ film nung intoktsü tuyuba rongnung, film piyong “Punjab” tetshia aliba intoktsü, “election” aser “parliament” o intoktsü aser azü ka tenüng agi Jackie Chan intoktsü densema lir.

Akali Dal aser BJP nati yimsüsüba state, Punjab nung sangküm Assembly election agitsü, aser iba film ajanga state sorkar tenüng menüktsüba nembangtsü atema Censor Board Chief-i iba film nokdangtsü merang, ta aikati aitsüogo.

June 13 nü Justices S C Dharmadhikari aser Shalini Phansalkar-Joshi nati akumba bench-i CBFC dang film ji ghonda 48 tsüngda agizüktsüla, koba ajanga film yanglurtemi June 17 nü iba film sayatettsü, ta metetdakja liasü.

“Board-i tuyuba ama natzü anaba noksa aser disclaimer yanglushiba dak alaka June 6 nü CBFC revising committee-i film nung temelenshi 13 benokbaji agiener,” ta High court-isa obendang agüja laisü.

Udta Punjab nung Shahid Kapoor, Alia Bhatt, Kareena Kapoor aser Diljit Dosanjh nungeri tongti shilem agia lir.