Gurgaon, February 9 (Agencies): Mumbai nung taoba hopta Gurgaon yimtak kimong ali tsütsü nungi mangatettep tila ka adokba ajanga telok ana kümtetter nisung 10 dak tema taküm laluogo aser iba dak sentakba nung Haryana Police temi telok anarongnung ka indang lenir Sandeep Garauli kahsetogo.
Garauli yimtsüng nung alir Jat kin nungi Bhoop Singh aser Mehar Chand na tsüngda Gurgaon aser Pataudi lenmang anasa aliba ali square metre 200 atema 1990s mapang nungi mangatettep adoka liasü.
1997 küm Bhoop Singh pusemer Sandeep Garauli aser Mehar Chand pusemer Narender na asangur asüba mapang iba ali raktepa liasü, ta yimtaklirtemi police dang ashi.
Anogo ishika lir külen Narender aser par medemer Hemant nati Sandeep Garauli dak kotari ka agi aiben atsüng aser iba dak sentakba nung tena anema nisung tepsettsü merangba ken o ka benoka liasü. Ajisüaka pa masü kümzük.
Ibaji tetenzüker sür iba mangatettep tamajungba aküm.
Sandeep Garauli-i tangar oset tashiyim agi bener aoba aser Arms Act kübok aibelenba atema December 15, 1999 nü ken o ka benok. Iba ya pa asoshi mezüng case liasü.
Garauli tebu ya Haryana Police nung sub-inspector liasü anungji police karibo Garauli dang aochia liasü.
Police-i ashiba agi, 2000 küm Sandeep Garauli tedi tambusang Kuldeep Singh aser tebu tanobu’er jabaso Bhram Prakash nati Mehar Chand pusemer Mahavir Singh tepset.
Iba mangyangji parnokia 2001 küm Behrampur yimtak Sandeep Garauli tedi, advocate Naresh Kumar(Nehru) puer mi agi rongseta südaktsü.
Iba mapang tashi nungbo telok anaprong nungi lenirtem süadoker liasü.
Iba sülen tejashi marem Sandeep Garauli-i Fauji telok nungi Neetu Gahlot aser Binder Gujjar nunger den lokteper pai aniba telok ka kümtet.
Gurgaon fast track court nung January 10, 2004 nü judge B.M. Bajaj jakdang nokdangtsü alisang Hemant court-i aoba mapang Sandeep Garauli’er teloki amak aser pa den aliba police ka yangji atanga asü saka Hemant bo teyirudang kanga mejungi yiru aser anogo 18 lir asü.
Kasa anogo nung police-ia Sandeep Garauli’er züngsem asem kahset.
Anungji yamaji küm aika azü tokshitepba aruba sülen Police Commissioner Navdeep Singh Virk-i, “Ozü teloki Gurgaon nung iba azü tokshi anendaktsütsü,” ta shiogo.
Pai, “Gujjar ya dang tepuokdak lir aser Sandeep Garauli ya Crime Branch-i Mumbai nung kahsetogo,” ta shisem.
You must be logged in to post a comment Login