Mangdang akaba sorkar ka yanglutsü election nung noktaker: Alemtemshi Jamir

Mokokchung, Tsüklai 22 (TYO): Nagaland nung sorkar aser yimsüsüba tajung ka nüngdaker ta nübur ola adokba angashia Nagaland tajung ka yangertsü aser mangdang akaba sorkar ka yanglutsü asoshi Nationalist Democratic Progressive Party (NDPP) telok ya tentetba lir, ta 25 Mongoya Assembly Constituency nungi NDPP candidate aser NDPP Working President, Alemtemshi Jamir (IAS Rtd)-i Chuchuyimpang yimdak pa election-i aitsü sangdongba sentong ka nung metetdaktsü.
Sorkar tajung ka bener arutsü asoshi yimsüsüba tajung nüngdaker aser yimsüsuba tajung bener arutsü asoshi ateta anguba inyakyim (transparency), inyakyim ajak nung telangzüba agütsütetba (accountability) aser temzüng akhümtsübua yimsü asüba (rule of law) sorkar ka nüngdaker, saka tang aliba sorkar dak itemji khenyongi mali, ta paisa ashi.
NDPP-i aniba sorkar kümer külen, NPF-i aniba DAN 3 sorkar-i ochimashi aser teraksa inyakba ajakji tajungtiba nung tasen küma melenshitsü tebilemba lir aser itemji o agi masü saka mapa agi inyaktsü, ta paisa shisem.
Taoba mapang nungi BJP-i NPF den teka amteper aru, aji saka, tang yabo NPF dak tashi maitba aika ajiteta BJP-i NDPP den dang pre-poll alliance partner-ji yangluba lir, anungji, taruba sorkarji shiba arutsü ta asüba nung arendaktsü kecha madoker, ta paisa ashi.
Nagaland nung akaba ajak agi ali dang, asenoki aliji tamshishia amshitsü aser item jagi rongsen kümdaktsütsü aser tarutsü lanurtem mapa inyaktsü maongka anguba mapatongtem inyaktsü, kechiaser ajakibo sorkar mapaji mangutsü, ta paisa lanurtem asoshi khuret süa ashi.
NDPP yagi tetsür-tebur kecha mebendangi yimsü asütsü aser tetsür jenjang ajungketba mapatem inyaktsü. Ibaji mapa küma NDPP-i tetsür candidate ka yoker, anungji, iba candidate-ji adoka NLA election otsü tasen ka yanglutsü imlar, ta paisa ashi. Paisa NDPP-i nüburtem asoshi teinyaktsü aliba terenlok sentong tapu balala lemsatep.