Mangdang ulushia lokti atema mapa tajung inyaktsüla: Kesonyu

Dimapur, March 29, 2017: Bodhbarnü Dimapur District Youth Convention 2016-17 nung Deputy Commissioner, Dimapur, Kesonyu Yhome, IAS-i jembiba noksa nung angur. 

Dimapur, March 29 (TYO): March 29, 2017 nü Nehru Yuva Kendra, Dimapur-i ayongzükba Dimapur District Youth Convention 2016-17 nung Deputy Commissioner, Dimapur, Kesonyu Yhome, IAS-i shilem agia liasü.
Tourist Lodge, Dimapur nung ayongzükba sentong nung jembidang Dimapur DC-i, “Meimchir libaliroa renlokba aser meimchir tetenzük putiotsü asenoki reprangdangra, asenok kong nungi aru aser koleni oner, ibaji meyipa reprangdangtsü mapang tongogo,” ta ashi.
Paisa, “Tilateri nung Naga nungeri parnok tsüngda rarateper, ajisüaka alima tesem kar nungbo meimchir jenjang ajungtsü atema mangdang yur nisungtemi taküm bendanga agüja inyaker,” ta ashi.
Iba dak sentakba nung pai lanur lenirtem dang, mangdang ulushia lokti atema mapa tajung jenti inyaktsü ayongzük.
Pai ashiba agi, lanurtemi alima tzümopung melenshiba atema süoki ia inyaktsüla, iba den külemi state nung election aser election inyakyim tamajung anema inyaktsüla.
“Election inyakyim tamajungtem merüktettsü atema nai-a kechi inyaker?” ta pai asüngdang.
DC-isa lanurtem dang, Naga nunger shilem 80 bo yimtak yimtsüngtem nung alir, anungji pei yimtsüngi oor shisatsü agüjang, kechiyong parnok asentenshi mesüra lokti tejakleni maotsü, ta ashi.
UNV-DYC, NYK, Dimapur, K. Phyobemo Lotha-i okila jembidang, youth convention akaba nükjidong ya ajak longjemer peii ajangshibatem lemsateptsü atema lir, ta ashiba den külemi NYK nükjidongtem tongmelang agi lemsatepa liasü.
Iba sentong ya National Youth Volunteer, Mhono Ngulie lenisüba nung agi aser National Youth Volunteer, Dimapur, Kelechuto Kin-i tepela anküp o jembia liasü.