Mangkolemba den sendaktepba apu techireper dang lir

Mangkolemba (Mkg), August 11 (TYO): Maneni ano Mangkolemba sendaktepba apu ka techireper dang lir, koba ajanga state ketdangsertemi Brihostibarnü nungi tenzüka iba apu meyanglu tashi gari tulutem senzüba nokdangogo.
Longnak-Mangkolemba lenmang nung kilometer 9buba nung aliba Kumpani ward nung Ngisameyong minor bridge mejungi lir, aser foundation tashi maitba ajanga mapang mashie ka nung chireptsüsa lir.
Iba dak sendakba nung ADC Mangkolemba, Wb. Imtiwapang Aier-i jila nung alirtem aser Mangkolemba Sadar kübok yimtsüngtem dang “PWD (R&B) dept, Mangkolemba-i iba apu meyanglu tashi iba tesem nung NST bus densema gari tulu senzüba tang nungi tenzüka nokdanger,” ta metetdaktsü.
Paisa, SDPO aser OC Mangkolemba-i iba mapaji ketdangsüa reprangtsü, aser ozüng/tetuyuba alema inyaker nem temerenshi agütsütsü, ta metetdaktsü.
Kasa tetuyubaji NST department danga metetdaktsüogo.