Mangkolemba nung 33 KVA Power Transformer amenok

Mangkolemba, March (TYO): February 20 nü Mangkolemba Power Station nung 33 KVA Power Transformer raksaba ajanga Mangkolemba jila aser temeket yimtsüngtem power makai kanga timtema liasü, kechiyong iba transformer ajanga Mangkolemba jila den kishikina yim 11 atsüker, ta Mangkolemba Ao Lanur Telongjem (MALT) Tir, Imjong Longkumer aser Gen. Secretary, Tinuniken Langu nati tanü sangdong ka ajanga metetdaktsü.
Mangkolemba Ao Lanur Telongjem (MALT) aser Tzudayong Ward sensotem teyaritep ajanga tim department-i transformer ji yanglushitsü atema February 26 nü bener yoka liasü. Iba sülen power supply khen atema Longnak nung SDO Power Dept. ajanga agia liasü.
Iba Power Transformer ji tanaben March 18 nü Mangkolemba Power Station nung amenokogo, koba ajanga nüburtem anisüngzüktsü.
Iba dak sentakba nung MALT-i Er. Tiameren Walling, EE, Transmission Kohima, Er. Chubatemsu, SDO Longnak, Imotiba Kichu, JE Mangkolemba aser Power Department Mangkolemba nung staff ajak dang pelaba lemsatepogo.
MALT-isa, nüburtemi iba mapang nung electrical osettem mamshiba aser small scale industries aser machinery mamshii anena ataba atema pelaba lemsateper, ta kasa sangdong nungsa shia lir.