Mangkolemba nung election dak sendakba senden ka amen

Mangkolemba (Mokokchung), Tsüklai 10 (TYO): Taruba state assembly election dak sendakba nung Tsüklai 10, 2018 nü Dobashi Conference Hall, Mangkolemba nung 28, 29 & 30 Assembly Constituencies atema General Observer, J.M. Pathania, IAS-i 29 Jangpetkong & 30 Alongtaki Assembly Constituencies nungi security sepaitem, EEM team, Flying Squad team aser Static Surveillance team den senden ka amen, ta ketdangsertem osang ka ajanga metetdaktsü.
Iba senden nung Observer-i team balala nungi züngsemtem aser security sepaitem dang election tesünep nung tajungtiba agi takok ngua agitettsüsa yimya tajung amshia iba den külemi kanga sangra-a pei nem lemzüktsüba mapa inyaktsü metetdaktsü.
Kasa senden nung ADC Mangkolemba aser RO 30 Alongtaki A/C-ia security sepaitem aser team balalai amalitepa inyakdaktsüner ta mepishiba den külemi election takok ngua agitettsü atema pei nem lemzüktsüba mapa tajungtiba agi inyaktsü ajungshia liasü.
EAC, Kedale Sebu-ia team balala dang pei teinyaktsü shilem metetdaktsüba den külemi telatetba balala metetdaktsü.
Iba senden ya SDO Civil, Mangkolemba, Chonpen Ezung leniba nung agia liasü.