Mangkolemba nung ki ka rongdok; shinga meyiru

Mangkolemba, May 11 (TYO): May 09, 2017 nü Mangkolemba, Mangko ward nung Lipok Jamir’er ki rongdok, ajisüaka iba lendong atalokdang kidangji shinga maliba ajanga nisung shinga meyiru, ta tanü Mangkolemba Ao Lanur Telongjem (MALT) Tir, Imjong Longkumer aser Tongti tezülur, Tinu Langu nati sangdong ka nung metetdaktsü.
Iba mi lendong ya short circuit ajanga adok südi ta bilemer aser iba lendong ajanga sen lakh 25 dak tema jenjang kiojen samaogo.
Tia makatsü kaji, Mokokchung district kübok Mangkolemba ya tzükong asem atema sub divisional headquaters ka süaka Fire Department mali.
Joko küm aika Mangkolemba nung mi lendong aiben ataloker, saka fire brigade maliba ajanga ki aser kiojen jenti samaogo.
May 9 nü tatalokba nunga, Mangkolemba nung fire brigade dept. ali asübo miji azüokteta ki aser kiojen kümzükteta liasü, ta MALT-isa ashi.
Iba dak alia Mangkolemba nung police department-ia senzüsembongtsü nung timtem kanga ajangshir, kechiyong department gari mali; police ketdangsertem aser sepaitemi office mapa atema-a nija gari hire asütsüsa akumer, ibayongji police-i tekaraba nung nüburtem meyariteter, ta MALT-i ashi.
Anungji, lendong aser timtem mapang nung nüburtem tajungtiba agi tenzüktettsü atema MALT-i tim department balala dang nüngdakba service agütsütsü mepishia metetdaktsür, ta sangdong ajangasa shisem.