Mangkolemba nung lokti nübodoka mapa inyak

Dimapur, September 27 (TYO) : Mangkolemba Baptist Arogo-i ketdangsüa September 25, 2015 nü Longnak nungi Mangkolemba tashi lenmang nung lokti nübodoka mapa inyakogo.
Longnak nungi Mangkolemba tashi gari lenmangji kilometre 11 shi lir aser iba lenmang ya Japukong, Tsurangkong aser Changkikong atema tongtipangtiba lenmang ka lir.
MBA teinyaktsü aika liaka iba mapa acha-ayanga inyakba aser nübortem ajungmesoba atema arogo nem tenüngsang agütsür, ta ADC Mangkolemba Imtiwapang Aier-i lokti nübodokba mapang ashi.
Mapa inyakertemi Kumpani waiting shed, Longnak lenjem aser Mangko ward nungertem nung inyak. Tesüiba küm 11 tashi kilometer 11 tasazük gari lenmang ya mulungtet telok kari dang anepalua arur.
Mezüngbo arogoi gari lenmang raksa alidak nembanga aotsü aser lenmang merükteta aotsü atema telemtetba agir council aser GB tem dang asüngdang saka iba mapa asoshi kanga junga bilemdanga olemtepba sülen lokti nübodoka amungtsü lemtet ta MBA sannüker, Dr. Akok Amer-i ashi.
Iba mapa nung Tzükong asem nungi nisung meyirjang ka den timba adenshia yaritep.
Iba mapa inyakba sülen Mangkolemba Sub Division kübok alirtemi sorkar dang Longnak-Mangkolemba lenmang anepalutsü atema mepishia metetdaktsüogo.