Mangkolemba nung sorkar mapa inyaker aika mapai marur

Mangkolemba, June 12 (TYO): June 10, 2016 nü Mangkolemba Ao Lanur Telongjem (MALT)-i Mangkolemba jila nung sorkar office kar sema aodang sorkar ketdangser aser staff tem aika mapai maruba putetogo, ta MALT Tir, Imjong Lkr aser General Secy., Lanutemjen nati sangdong ka ajanga metetdaktsü.
Tamalena MALT-i aiben parnok nem tekümdangtsü metetdaktsüogo aser parnok mepelabaji shidi ajanga Additional Deputy Commissioner tem nem metetdaktsüogo, ta MALT-isa ashi.
Departmental office tem rongnung HODs mapai marui alibaji PHED, CDPO, Irrigation & Flood Control, Agriculture aser Block Development Office (RD) lir.  Item office nung staff tema mapai marui liasü, aser office ka nungbo temalen yokba staff ana putet, ta sangdong nung shia lir.
“Ketdangsertem aser staff temi pei mapa aser khuret memetetba ajanga MALT mepelar. Sorkar mapa inyaker ajakji nüburtem tenzüktsü atema shim saka parnok teinyaktsü mapa sentoka toktsübaji tanü Naga lokti nung atakatem ka lir,” ta MALT-i ashi.
“MALT-i Chief Minister aser par legislative züngsemtem, Chief Secretary, Commissioner aser Secretary tem, Principal Directors aser Director tem den Engineer-in-Chief tem dang, state nung sorkar inyakyim koda aoer ta asüngdanger. Nagaland sorkari state sorkar mapa inyakertem mapai junga maruba aser sorkari latetba temzüng ozüng tashi mangartem nem temerenshi tulu agütsüba ajanga inyakyim ajak asüngtettsü mapang tongogo,” ta sangdong nungsa shia lir.
“State sorkarisa office tazüng alibaji meteta mapa marur mesüra nendaka meinyaker staff ajak mapa nungi anentsütsüla, kechiyong parnok mapa melenzüktsüsa Naga nunger ochishir lanur tazünger tetemjen aika lir,” ta MALT-isa ashi.
MALT-i item dept. nung tekolakpurtem dang, item ama ketdangsertem aser par staff tem nem tekeraba nung tapet temerenshi agütsütsüla mesüra MALT-i mera tesashi agitsü, ta  metetdaktsüogo.