Mangkolemba SDEO-i mapa makoker aser HA mapai maru ita sen agi : MALT

Mangkolemba, June 14 : Mangkolemba nung Sub Divisional Education Office (SDEO) nung HA küm junga mapai maru ser ita sen agizüka agir, iba senji pa kong nungi agizüka agir, ibaji sorkari ashitsüla ta Mangkolemba Ao Lanur Telongjem (MALT)-i takangba ka agütsüogo.
SDEO Mangkolemba nung HA inyaktsü yoksang nisung ka tenüng agi Thsipong SDEO Mangkolemba nung yaküm 2015 küm June 05 nü aruagi SDEO Mangkolemba nung ‘Joining report’ agütsür aoba kena maru ta MALT-isa metetdaktsü.
Nagaland nung Mangkolemba SDEO ya tuluka lir, iba kübok GPS 54, GMS 13 aser Composite Schools 11. Iba yagi Mokokchung aser Wokha district kübok aliba school-tem repranger, ajisüaka mapa inyakertem maruba agi nübortem kanga akoksar ta lanurtemisa ashi.
Ano, Mangkolemba SDEO Wt.Chubamenlaia mapa inyakyim memeteti inyakba putetogo, kechiyong lai June 5, 2015 nü Thsipong HA aruagi Joining report agütsüdang pa meyong Last Pay Certificate (LPC) aser Service Book (SB) kecha meshia meyui dang pa mapa nungi aniok aser pa mapai maruba tepiyong SDEO-i lai department nem  kecha osang magütsüi odang toktsü. Iba ama pei mapa aser khuret memetet amai inyakba kuliji metetner ta MALT-isa jashia metetdaktsü.
“Onoki tang aliba SDEO Chubamenlai mapa makokba  reprangtetogo, anungji School Education departmenti ibaji reprangtsüla aser Thsipong HA daka pai aibelenba yari temerenshi agütsütsüla ta MALT-isa sorkar nem takangba ka agütsüogo.
Parnokisa nüngdak maliba nung  yimsüsür aser yimten teloki lanurtemi tarutsü asoshi bilema inyakdang tebang maittsüla ta metetdaktsü. School Education department-i iba ama timtem ya mereprangtsüra onoki onok nükjidong tonga inyaktsü temulungtetba lir ta parnokisa metetdaktsü.