Mangkolemba Sub-Division Volleyball Tournament tenzükogo

Mongkolemba, November 03 (TYO): Tongti tesemdanger, Bendangliba Tzudir, Director, Industries & Commerce Directorate, Nagaland-i lapoktsüba sülen Mongkolemba nung Mangkolemba Sub-Division Inter Range Volleyball Tournament asayatsü tenzükogo.
Mangkolemba ADC Headquarters kümer küm 25 abensaba Silver Jubilee benjungmong den sentaktepa, Mangkolemba Ao Lanur Telongjem (MALT)-i ayongba asayamong nung asayatsü telok 8 tashi toktepa shilem agitsü tenzüka lir.
“Tesüiba mapangbo Mangkolemba Sub-Division nungi asayartem Nagaland state ajunga nung asayar tajungtiba ta züngshia aru,” ta shia, asayartemi tesüiba mapang ama, temaba jenjang ajangzüktsü tayongzükba olen ka tongti tesemdangeri metetdaktsü.
“Sub-District Industry Centre Mangkolemba nung tarutsü anogotem tentettsü renema lir. India sorkar kübok Handloom Ministry-ia Mangkolemba küboksa, Tzürangkong nung Handloom Cluster Centre ka tentettsüogo aser Waromong yimtsüng nunga Handloom Cluster Centre ka tarutsü anogotem tentettsütsü sentong lir,” ta shia, lanurtem talisa, kaketshisatsü bushitsüren toktsür alirtemi maongka tajung ajangzüka, item centre-tem nung terenemshitsü agia, pei taküm jenjang tajungba kümdaktsütsü tajungshiba olen ka Bendangliba-i lemsatep.
Asayamong tenzükba sentong nung MALT Tir, Imjong Longkumer aser ADC Mangkolemba, Imtiwapang Aier natia onük tatsütsü jembia liasü.
Asayamong tetenzükba asaya nung Loyong Village teloki Team Mangkolemba telok madak takok angu.
Anüngdang aser aonung naprong asayatsü ayongba asayamong ya tan November ita 4 nü tembangtsü.