Mangkolemba: WSA teloki Open Volleyball takok marok agizük

Dimapur, January 16 (TYO): Waromung Sports Association (WSA) teloki 7 buba Open Volleyball Tournament takok marok Mangkolemba nung yashi, Hokolbar nü agizükogo.
WSA teloki Ever Green Club (EGC), Ungma telok final asaya nung tsükdakja senpet sen 70,000 den külemi, running trophy agizük.
Final asaya asayaba jakdang asayamong shibangba sentong agia liasü aser iba sentong nung Supongnukshi, IFS, Conservator of Forest, Nagaland tongti tesemdanger liasü.
“Tesüiba 1980s mapangbo Mangkolemba sub-division nungi state aser national asayar jenti adoka liasü. Ajisüaka, tanübo asayar tajung kanga dang ajema adoker,” ta shia, asayartemi alizüng tulu yur bendanga agüja shilem agitsü tajungshiba olen ka tongti tesemdangeri metetdaktsü.
Tanabuba jenjang angur, EGC telokia tanabuba jenjang takok marok aser senpet sen 40,000 agizükba den külemi, tan asayamong nung semifinal atonger telok 2 – Sporting Club aser Thor Clan telok naprongla nem senpet sen 15,000 agütsü.
EGC asayar, Imsentoba-i Player of the Tournament sempet agizük aser WSA asayar 2 – Bendangtemsu o Toshienba nati Best Spiker of the Tournament aser Best Setter of the Tournament sempet agizüka liasü.
Asayamong lapokba sentong nung tongti tesemdanger, Asangba Chuba, IAS, Commissioner of Taxes, Nagaland-i lapoktsüba sülen tan asayamong ya tan January ita 13 nü tenzük.
Falcon Club, Mangkolemba teloki ‘Excel, Resolute, Strengthen’ omen nung ajemdaker kümshi ayongba asayamong nung telok 8 tashi tan shilem agia liasü.
Tan asayamong takok ngudaktsüba atema kija aser telok ajunga dang pelaba olen ka Falcon Club-ia tanü sangdong ka ajanga metetdaktsüogo.