Manipur anentsüh lendong nung 20 asü

Imphal, August 01 (Agencies): Tesüiba anogo asem tashi tzünglu maneni aruba ajanga Myanmar den arrtsülen aliba Manipur, Chandel district kübok yimtsüng ka nung anentsüh alua ki aika ponger ao aser yimdaklir 20 shi süogo.
Iba lendong ya Honibar nü state yimtiba Imphal nungi kilometer 168 shi pilar aliba Joumol yimtsüng nung atalok.
“Assam Rifles aser anasa aliba Aibol Joupi yimdaklirtemi teyaritep maparen inyakdagi,” ta state home department ketdangser kati ashi.
“Tesem ajak merüktetba sülen ang asürtem züngdangba tejangja metettsü. Tawa Manipur nung anentsüh lendong tamajungtiba nung tang tashi nung nisung 20 asüba jangjaogo aser ka kümzükogo,” ta ketdangserisa ashi.
Tesüiba anogo ishika tzünglu maneni aruba ajanga Manipur nung nemzüka aliba tesemtem aser Chandel district nung ayong aika nung tzü lendongbang adena yimdagi.
Tzünglu ajangasa tzülu aika tzü agi metsüngbangogo aser Thoubal district, Etok canal Yairipok Chandrakhong nung aliba apu kabo tzü agi ponger ogo.