Manipur Angh Heptulla-i Modi den ‘Flying Doctor” scheme lemsatep

Imphal, August 7 (Agencies): Manipur Angh Najma Heptulla-i Prime minister dang lai apitetba ‘flying doctor’ indang sentong lemsatepogo ta Hombarnü metetdaktsü.
Iba sentong ajanga Manipur nung tenemlen aliba nisungtem aser kidangertem teyari angutsü, ta Heptulla-i ashi.
Heptulla tang Delhi nung lir aser lai osangbener dang ashiba agi, tanü Prime Minister Narendra Modi nem rakhi alenloktsü aser idangji ‘flying doctor’ indang osang lemsatep.
“Iba scheme ya tasen ka asütsü aser Northeast tesem nung aser tanga state tem kübok tenemlen alirtem atema tajangzük tulu asütsü. Iba maparen tembangba sülen ni prime minister dang sayatsütsü atema mepishia asüngdangogo” ta laisa shisem.
Taoba hopta sentong ka nung Manipur Angh Heptulla-i “North Eastern Council ajanga flying doctor scheme atema sen crore 25 lemzüktsüogo. Iba mapa kübok tenemlen aser lenden nung aliba district tem nung helicopter tem ajanga medical teyari agütsütsü” ta metetdakja liasü.
Tawa tu Manipur nung küm 20 sülen tzümetsüng timtem tulu ajurua liasü aser iba ajanga state ajungalen Japanese encephalitis aser dengue tashidaktem adoka nisungtem kangshir.
Talisa tzüngluru mapang Manipur tesem balala nung anentsüh aluba ajanga surface transport service tetsükdaktsü ajurur.