Manipur Angh Syed Ahmed süogo

Mumbai, Sept 27 (Agencies): Manipur Angh, Syed Ahmed tanep Mumbai nung aliba nija hospital ka nung alima nungi pilaogo, ta par kinüngertem osang ka ajanga ashi.
Pa cancer tashitak agi shiranga liasü aser taoba hopta Lilavati Hospital-i anir oa liasü, ta parnokisa ashi.
Pa arishi küm 73 liasü aser pai pa kinüngtsü den jabaso ka aser jala ana toktsür alima nungi pilaogo.
Manipur Angh menden atema May 16, 2015 nü pa tenangzükba agia liasü. Maharashtra nungi taoba mapang Congress lenir Ahmed UPA sorkar mapang August 26, 2011 nü Jharkhand Angh atema shima liasü, aser north-east state Manipur-i belen.
Pa Congress nung mezüng dena yimtenren nung ajemok, yimtenren mapa dak alia kaket zülutsü pa dak sempet liasü. Ahmed ya Hindi aser English oshi na nung master degree angur aser Urdu nung doctorate angur ka liasü.
Pai pa taküm otsü ‘Pagdandi se Shahar Tak’ kaket züluogo. Pai züluba kakettem rongnung ‘Maktal se Manzil’, ‘Kafas se Chaman’ aser ‘Jange-Azaadi Me Urdu Shayari’ lir.
1977 küm pa Congress nung aden aser Nagpada constituency nungi toktepa Maharashtra Assembly nung MLA ponguben inyakogo, iba dak alia Maharashtra nung minister-a inyakogo.
Ahmed asüba osang angashia sangdong balala ajanga Nagaland Angh P. B Acharya aser Chief minister T R Zeliang nati asür kinüngertem den asüko osang lemsatepba metetdaktsüogo.