Manipur atema BJP ya kanga lendong: Gaikhangam

Imphal, October 19 (Agencies): Deobar nü Manipur Deputy Chief Minister Gaikhangam-i Bharatiya Janata Party (BJP) State Unit aija, Manipur atema BJP ya kanga lendong lir, kechiyong parnok teloktep party Naga People’s Front (NPF) indang tongtibang onükji Naga nuger aliba tesem ajungaji administrative unit ka küboki dang aitdaktsüner, ta ashi.
Imphal East District Congress Committee-i ayongzüka Imphal East, Ibudhou Wangpurel Khana Chaoba Shanglen, Akampat nung Indian National Congress (INC) political Conference nung jembidang Gaikhangam-i iba o ya jembia liasü.
Iba Conference ya taoba Ato kilonser Jawaharlal Nehru 125 buba asobamung nüngtem nung ayongzüka liasü.
Manipur Pradesh Congress Committee (MPCC) Tir, Gaikhangam-isa State BJP aija, saffron party ya state atema tetemsü masü, ta ashi.
Kodangsa Centre nung BJP tashii arudir Manipur nung lendong adoker ta ashiba den külemi Great June Uprising mapang azütokshiba indang jembia liasü.
Centre nung Atal Bihari Vajpayee lenisüba nung BJP sorkar alidang Manipur nung loktii sorkar ki aika rongtoktsü, ta pai ashi.
Tang-a Centre nung BJP sorkar lir aser NSCN (IM) den tezüngzüktep agiba ajanga tebilemtsü ka bener arutsüogo, ta Deputy Chief Minister-i ashi.
Paisa, state sorkari maneni takhangba agüjaka tawa NSCN (IM) den yimjung tezüngzüktep nung alibatem sangdongtsü atema tang tashi Centre-i atsü-ayonger, ta ashi.
“BJP ya teti Manipur atema teyirutsüba aser tebilemtsü ka lir, kong party-i aiben koda masüba tensa bener arutsür. State atema amokmeren tulu BJP mita alitsüla,” ta pai ashi.
Iba political senden nung taoba minister Bijoy Koijam, MLA N Loken, Manipur JD (U) Tir M Tombi, general secretary Lien Gangte aser MPCC nungi tongtibang lenir aika dena liasü.