Manipur BJP lenirtem Modi ajurui Delhi-i ogo

Guwahati, October 29 (Agencies): Naga yimten ken o jembiba ajanga Manipur nung tensa mejungi aliba mapang, state nungi BJP lenirtem telok ka Ato Kilonser Narendra Modi ajurutsü atema New Delhi-i ogo.
Manipur ruling party nungi lenirtem linük yimtiba tonga aoba ya state indang litsü nung mekongshidaktsütsü atema lir.
NSCN (I-M) ajanga Assam, Manipur aser Arunachal Pradesh nung Naga nunger aliba tesemtem ya Nagalim (greater Nagaland) nung dendaktsütsü meranger, kong parnoki Myanmar nungia shilem kar dendaktsünür, ta osang ajanga ashi.
Naga nunger aliba litsü ajunga lungjemtsüla, ta NSCN (IM) ajanga akhangba Manipur-i anema nokdaka arur.
“Manipur litsü-lika nung mekongshidaktsütsü mechi onoki Ato Kilonser den ajuruteptsü meranger,” ta Manipur BJP general secretary N Nimbus Singh-i osangbener dang ashi.
Parnoki kasa onük dak sendakba nung ajemdaker Union home minister Amit Shah dena ajuruteptsü merangtsü.
State litsü-lika shitak wazüka ayutsü mechi BJP teshimtet telok ajanga centre nung party balala nungi lenirtem den senden amener, ta Singh-i ashi.
New Delhi-i Naga yimten olemtep ya October 31 tashi nung renemtsü lemtetogo, ta Naga National Political Groups (NNPGs) ajanga Deobarnü shia liasü.
Aji masüdang Hombarnü New Delhi nung interlocutor Ravi-i NSCN (IM) lenirtem den senden menogo aser Mongulbarnü NNPGs working committee den-a amen.
NSCN-IM tenüng nung Ato kilonser aser chief negotiator, Th Muivah-i shilem agi.