Manipur bomb lendong nung ka pokset, 3 yiru

Imphal, Nov. 20 (Agencies): Tanü Imphal nung bomb asem apokba lendong nung nisung ka pokset aser asem yiruogo.
Hombar nungi tenzüka Imphal nung International Sangai Festival tenzüktsü aliba ajanga yimti nung security akangshia aliba mapang ka nung iba lendong atalokogo.
Mezüngbuba bomb ji tanep 8:00 ako meta Singjamei tesem nung apok, aser iba lendong nung Bihar nungi nisung ka tenüng agi, Vinod Rai pokset; pa indang ‘scrap’ dokanji bomb apokba tesem anasa liasü.
Ano nikongdang 5:00 ako meta defence wing public relations officer office anasa bomb ka apok aser iba lendong nung Assam Rifles ka yiru.
Tasembuba bomb ji nikongdang 5:14 ako meta All India Radio campus nung pokloktsü aser iba lendong nung CRPF sepai ana yiru.
State Chief Minister, Okram Ibobi Singh-i item tatalokba aitsüogo aser osangbenertem den jembidang pai, item ama tatalokba ajanga Sangai Festival nung adentsü atema India aser bendanglen nungi jaoka alirtem nem tarendakba agütsür, ta ashi.
Tang tashi nungbo bomb pokdaktsüba atema telok shingaia tenüng agia mali.