Manipur CM-i BJP sorkar aitsür

Imphal, May 29 (Agencies) : Centre nung BJP-i aniba sorkari Manipur nung mepetmesü adokdaktsür, ta Manipur Chief Minister Okram Ibobi Singh-i Deobarnü metetdaktsü.
“Kodangsa Centre nung BJP sorkar arudir, Manipur nung mepetmesü adokdaktsür” ta Imphal West district nung election sentong ka nung Ibobi-i ashi.
Manipur nung June 2 nü municipal elections agitsü lir aser iba dak sendakba nung tanü nüboyimba sentong ka nung Ibobi-i iba osang metetdaktsü.
Ibobi-i tesüiba tatalokbatem indang osang kecha mejembi, saka Atal Bihari Vajpayee’er sorkari NSCN- IM den arttsü telatet kecha melii ceasefire alitsü lemtetba anema June 18, 2001 nü Manipur nung mepetmesü adoka nisung 18 asüba aser aika yiruba dak ajemdaker jembi asütsü ama ajiteter.
Yaküm nungi Manipur nung Inner Line Permit (ILP) inyakyim tenzüktsü atema takhangba agüja lungkak aitba sentong balala agiyonga arur aser nisung 10 asüba den 500 den tema yiruogo.
“UPA sorkari Look East policy tenzüka yutsü aser NDA-i ibaji Act East Policy ta melen, saka küm ana süia arudang nübortem iba nung temelenshi kecha mangur” ta Ibobi Singh-isa aitsü.
Manipur nung tenzüka aliba mapatong ajakji UPA sorkar mapang tenzükba lir. Tang Manipur nung Tupul tashi train lenmang yanglur aser iba ya prime minister Manmohan Singh alidang tenzükba lir, ta paisa ashi.