Manipur CM-i Centre dang sen crore 500 meshir

Imphal, January 11 (Agencies) : Hombarnü Manipur Chief Minister Okram Ibobi-i Centre sorkar dang menoknok ajanga takoksa bener aruba nung yariteptsü atema sen crore 500 teyari meshi.
January 4 nü Manipur nung menoknok lendong atalokba nung nisung 9 asü aser 120 shi yiruba den ano kiojen aika raksatsü.
“Tanü (Hombar) chief minister-i Prime Minister Narendra Modi dang sen crore 500 teyari meshia züluogo” ta Chief Secretary Oinam Nabakishore-i ashi.
Mezüngbo state sorkari sen crore 20 dang teyari meshia liasü.
“IIT Roorkee nungi mongin telok ka Imphal-i arua teraksa asadangogo. Parnoki ashiba agi tetsür shishilembartem aser customer temi Imphal tiyongtsü nung aliba market complex asem telungi maitsüla kechiyong lendong keta lir ta kuli agütsü” ta Nabakishore-isa ashi.
“Mongin nisungtemi kiojen raksaa aliba nungi sample kar Guwahati nung tendangtsü atema bener yokogo aser iba osang anguba sülen ang talila metettsü” ta paisa metetdaktsü.
Imphal nung lenmang tezülen yokyayokjirtemi state sorkar dang parnok tsüngda tenangzüktep agia aliba ama mapa inyaktsü akhanger aser külen raksaa aliba market complex nung tetsür shishilembartem ashiba agi parnoki joko lenmang tezülen ang shishilembatsüsa akümer.
Menoknok tiyongtsü ser anokba Tamenglong nung alirtemia tanü sorkar anema lungkak aitogo. State sorkari raksa aliba kiojentem yanglutsü atema mapa meinyaker ta aija parnoki lungkak ait.