Manipur CM-i district tasentem magientsü metetdaktsür

Imphal, July 9 (Agencies): Manipur sorkari district tasen tentetba telemtetba meyipa magitsü ta Deobarnü Chief Minister N. Biren Singh-i ashi.
United Naga Council (UNC)-i Manipur nung district tasen 7 tentetba meyipa agiang ta sorkar nem takhangba agütsüba atema Biren Singh-i iba telangzüba agütsüogo.
Iba onük atema Hombarnü Centre aser state sorkar nungi ketdangsertemi UNC den ajurutepa senden ka amentsü sentong liasü saka ibaji thinenogo.
Koda masüba timtem kar ajanga Centre sorkar nungi teshimtet nübotem marutettsüsa akümer aser iba jagi olemtep athir, ta tanü sorkar osang ka ajanga ashi.
Manipur nung taoba Congress sorkari December 2016 nung district tenet tentet. Ajisüaka, Naga nungertemi district tasentem jagi Naga nunger litsü atsünga agir ta shia lungkak ait.
Manipur nung Naga nunger li mali aser district tasentemji ketdangsübaren tajungba inyaktsü aser terenlok bener arutsü atema lir, ta State sorkari telangzüba agütsü.
District tasentem tentetba anema, United Naga Council-i rongsenkettsüng mokdangba mapa ka ayongzüka agi aser ita pezü shi agia aruba sülen, taküm BJP-i aniba sorkar tenteter ang mokdangbaji agiena liasü.
UNC tir Gaidon Kamei tepuokdak nungi chiokba sülen, “District tasentem tentetba meyipa agitsü atema takhangba agütsütsü. Iba ya magizükra, onoki taruba campaign nung nübortem dang nungi tebilemba bendentsü atema sentong ka agitsü” ta ashi.
Sorkar aser UNC na tsüngda iba onük atema obang meputeper aser iba jagi asüng agitsü aliba sendenji athir.
Naga nungeri maneni rongsenkettsüng mokdangba ayonga agitsü akok ta sorkar ketdangsertemi arentaka bilemer.
Olemtep agiba ajanga district tasentem tentetba meyipa agitsü ta sorkar den angatettepba sülen taküm March ita UNC-i mokdangbaji agientsü telemtetba agi.