Manipur CM-i Minister shimshiba mapa temogo

Imphal, April 11 (Agencies): Manipur Chief Minister, Okram Ibobi-i anentsütsüpur minister tem aser mulung mesüi aliba MLA tem shimokba mapa temogo.
Ibobi-i Congress party bangdak lenirtem den o lemtep kar Delhi nungi meyipa aruba sülen Deobarnü pai  Angh, V. Shanmuganathan ajuruogo.
Tena senden minute 15 amendang Ibobi-i minister menden nungi anentsütsüpurtem tenüng aser minister atema shimtsüpur MLA tem tenüng agütsüogo, ta osang angazüker.
Ajisüaka tenangzükba agitsü anogobo ano melemtet, kechiyong minister tem aser temulung masüba MLA tem tsüngda mangatettep kar lir, ta party osang ka ajanga ashi.
Chief minister den atongtepa inyaker kati, “Tetsükdaktsüji bentetra tenangzükba agiba sentongji Mongolbarnü agitsü akok,” ta ashi. Ajisüaka tetsükdaktsütemji mebentetra tenangzükba sentongji April 13 sülen ang agitsü.
Mapa jeta meinyakba minister pongu anentsütsü akok. Minister 12 nungi 10 anentsütsü atema mulung masüba MLA temi akhangbaji bangdak lenirtemi magizük.
Congress MLA 48 nungi minister 25-i minister tem melentsü aser party Tir melentsü akhanger.
Tamalen Minister temi, parnok rongnung ka danga minister menden nungi anentsüra parnok ajaki minister menden toktsütsü ta jembia lir. Yamaji ka süra 2017 küm February ita nung assembly elections agitsü lia parnok maneni party nung alitsü mesüra toktsütsü akok.
Ano külen minister 10 prongla manentsütsü ta osang angashia mulung masüba MLA tem mepelar.