Manipur CM-i nisung 800 tebilemtsütem angadang

Imphal, June 11 (Agencies): Manipur Chief Minister N Biren Singh-i ita nung anogo 10buba nung tenem nung aliba nisungtem dang parnok tebilemtsütem lemsateptsü asoshi ayongzüka inyaka arudar aser tang tashi nung nüburtemi kanga telangzüba tajung agüja arudar.
‘Hill People’s Day’ tanabuba Chief Minister indang Secretariat complex nung Honibarnü ayongzüka agiba nung, yimdak nung lenirtem aser lokti balala nungi lenirtem, lokti aser yimtsüng 260 tenüng nung parnok 800 shi state nung tenem nung aliba district ajak nungi arua Chief Minister den ajurutepa liasü, ta CM Secretariat ajanga metetdaktsü.
CM Biren-i nüburtem den ajurutepa liasü. Item nisungtem arrtsü len aliba kinük tesemtem nungia arua liasü aser CM Secretariat complex nung anepdang 8:45 nungi nikongtsütsü 2:30 tashi ghonda 5 shi khendanga tanen makai CM-i parnok den ajurutepa sensakasem, ta kasa osang ajanga metetdaktsü.
Chief Minister-i ashiba agi, lokti balala aser yimtsüng lenirtemi lenmang majungba, tzü tajemtsü tebilemtsü, asayadak moapu makaba aser community hall maliba amala tebilemtsütem lemsatep. Paisa ashiba agi, Hill People’s Day aser Meeyamgi Numit ajanga tebilemtsütem mengujemi aliba aika jangjaogo.
Pai ashiba agi, state nung BJP-i aniba sorkar kümtetba sülen nungi nüburtemi State administration dak joko temolung alemba sayur. Kinük nung aliba tesem; Tousem, Nambashi aser Jessami amala nungia ni ajurui aruogo, ta paisa ashi.
Chief Minister-i maneni ashiba agi, tawa tzümetsü nung takoksa ajururtemi parnok tebilemtsütem lemsatepogo. Hill People’s Day aser Meeyamgi Numit nung tebilemtsütem dak sendakbatem mapangshi office ajanga reprangshia arudar aser tebilemtsü aser ken o tem shilem 60 bo jenjang tapet agia inyak tenzükogo.
Alinük dak ajemdaker budget ka benokba Centre sorkari agizükogo, ta CM-i metetdaktsü aser tenem lima aliba nübur tebilemtsütem tawa Hill Area Development Programme sangdongba ajanga anepalutettsü, ta ashi. Iba sentong state nung mezüngbo Chandel, Tamenglong aser Churachandpur district tem nung amenloktsü.
Maneni lenmang yanglutsü asoshi sen crore 600 alanga detailed project report ka Centre nem agütsüba pai metetdaktsü.