Manipur CM-i sepaitem dang nüburtem den jungteptsü ajungshir

Imphal, Tsüklai 10 (Agencies): Taoba mapang Manipur nung tashiyim amshia taochi melie maparen balala inyakba sepaitem dang state sorkari parnok den amalitep akatsü shiogo. Manipur nung army aser paramilitary force tem sorkar den tesendaktep tajung lir, ta News18 den sensaksemba mapang, Manipur Chief Minister, N Biren Singh-i ashi.
Taoba mapang ama masü saka iba ken o nung yimya balaka agi jembishinüa mitkartem dang nüburtem den jungtepa telungpurtem den tashi ita raratsü ajungshiogo, ta pai ashi.
“Yangi aliba army aser paramilitary force tem dang tali shisadanga nüburtemi agizüktettsüsa inyakang, ta ni ajungshiogo. Telungpurtem ya nüburtem nungi bendangtsüla. Nüburtem den amokmerena jembia, merenshia mesüra tsübudaktsüra, parnoki tanga lenmang amshitsü. Na nüburtem den lira telungpur den raratsü temelaba akümtsü,” ta chief minister-i ashi.
Mitkartemi ‘Act’ kar amshia tensa kar nung telungpurtem ken o meyoktepa amshiba osang angashia kanga tezü adanger, ta Singh-i ashi.