Manipur CM-i Sonia den ajuruteptsü

Imphal, April 3 (Agencies): Hombar nü Manipur Chief Minister Okram Ibobi Singh-i Congress Tir, Sonia Gandhi den cabinet menden lemshitsü indang onük jembitsü atema Delhi-i aotsü, ta tanü osang ka ajanga metetdaktsü.
Ibobi den külemi tawa tasen shimba state unit Congress tir, T.N. Haokip aser Deputy Chief Minister Gaikhangam na aotsü.
Parnoki minister tasentem shimoktsü tarensen renemogo aser iba asoshi Sonia Gandhi nungi temelaba meshitsü dang anünga lir. Temulung masüba Congress MLA temi taruba Mongulbarnü parnok tenangzükba agiba sentong agitsü amai imlar, ta osang ajanga metetdaktsü.
Ano osang ka ajanga ashiba agi, Manipur nung minister menden nungi agientsü amai bilemba nisung 10-i parnok den temulung masür MLA 13 dena lir ta shia cabinet nung magientsü atema noktaker. Parnok telok nung Congress züngsem 23 lir ta parnoki ashir.
“Cabinet züngsem melenshitsübaji chief minister ka dak tashi lir aser iba nung nisung shingaia tasüngdangba mesüra tebang maitsüla” ta Manipur Pradesh Congress Committee tir, Haokip-i osangbener dang ashi.
Cabinet züngsem melenshitsü atema takhangba agütsür Congress MLA tem rongnung Haokip dena liasü.
Manipur unit Congress tir inyaktsü atema Haokip shimba tenüng nung Honibar aonung temulung masüba Congress MLA 25-i sentong ka ayongzüka agi.
Manipur nung züngsem 60 agi akümba assembly nung Congress MLA 48 lir. Taoba assembly election nung parnoki menden 42 nungi dang takok angu saka iba sülen tanga teloktem nungi MLA 6 tashi parnok den aden. Congress legislature party züngsemtem rongnungi parnok 25-i cabinet züngsem melenshitsü atema takhangba agütsür.