Manipur CM-i telungpurtem aliba tesem renlokdaktsütsü

Imphal, Aami (June) 8 (Agencies): Chandel district kübok Kengjoi sub-division nung terenlok maliba atema chief minister N Biren Singh-i iba tesem nung infrastructure renlokdaktsütsü atema mapa inyaktsü tetuyuba agütsü.
Iba tesem ya Myanmar den arrtsüa lir aser mapang ka iba tesem ya telungpur telok aika jenokdak liasü, saka küm 10 shi tejakdang sepaitemi parnok aridok.
Tang iba tesem nung 19 Battalion Assam Rifles mapa lemzükja lir aser paramilitary force-i asüngdangba sülen Biren Singh-i sub-division nungi yimtsüng 21 nungi lennirtem aser ketdangpurtem den ajurutepa senden amen.
AR ketdangsertemi Biren dang iba tesem nung avocado plantation asüba ajanga tajangzük alitsü ta ashi.
Iba tesem nung connectivity tajung maliba, water supply, electricity aser tanga tang nüngdakbatem maliba ajanga yimdaklirtemi timtem kanga ajurur ta AR ketdangsertemisa ashi.
Ketdangser aser yimdaklirtemi khuret lemsatepba sülen Chief Minister-i Manipur State Power Distribution Company Ltd dang phone ajanga Tuitong aser temeket aliba tesemtem nung tekaratiba nung power supply agüjang ta tetuyuba agütsü.
Paisa deputy commissioner (Chandel) Krishna Kumar dang Sehlon nungi New Samtal tashi lenmang yanglutsü atema project report ka renemang ta tetuyuba agütsü.
Centre-i Manipur nem Border Area Development Programme kübok senotsü teyari talila agütsütsü mulunga agizükogo anungji pai project ji Union home ministry dangi abentsü ta Biren-isa metetdaktsü.
Paisa AR ketdangsertem dang poppy melena lemongrass, avocado aser banana tsünütsü ayongzükang ta ashi.
Iba tesem nung somomo junga tsünütetra sorkari banana fibre extracting machines benoktsü renema lir ta Biren Singh-isa shisem.