Manipur CM tepsettsü amokmerensang Tamil Nadu nung apu

Imphal, Yimpoksüi (November) 2 (Agencies): Manipur Chief Minister N Biren Singh tepsettsü ta amokmerenba nisung ka Brihostibarnü Tamil Nadu nung puogo.
Imphal West district police, Tamil Nadu police aser Delhi police (Special Cell) nungi külem telok kati nisungji apu.
Iba nisungji Ali Ahmed (Babuji) ta jangjaogo aser pa ya Cachar, Assam kübok Lalpani nung alir.
IGP Manipur, Clay Khongsai lenisüba police telok jagi Tamil Nadu kübok Bathalapalli tesem nung Babuji apui.
Babuji ya Manipur nung alir aser pai October 5 nü social media nung clip saka sayuba nung Chief Minister tepsettsü ta shia lir aser paisa o tamajung aika jembi, ta police-i ashi.
Video nungsa Babuji-i Manipur state anema raratsü ta amokmeren aser iba nung ajemdaker Manipur police-i pa anema FIR ka benok.
Md Farooque ta ser nisung ka asüba sülen Babuji-i iba amokmerenba osangtem metetdaktdü.
Tharoijam nung Farooque ya scooter ka auyaba atema tai tonglokja zükset.
“Sorkar kechi repranger? Biren, na taküm linür aser sünür, onoki na senzüsenongba meteta lir. Farooque dak atalokba lendong shinga nem-a tajurudaktsü aser ozüng ka yangluang” ta pai video nung ashi aser iba atema ita ka mapang latettsü.
Police-i Babuji aputsü atema aodang pa Cachar nung maliasü aser Tamil Nadu nung iron industry ka nung inyakba tsüngsü bushitet.
“Meta talang ka pila alibaji khuret ka masü aser ozüngi na meneptsü. State lennir ka amokmerenba ya police-i zübazüba metoktsür” ta SP Jogeschandra Haobijam-i ashi.
Lamphel OC Sougrakpam Chandrakumar lenisüba kübok Manipur police telok kati tanü Babuji Imphal tonga anir aruogo aser JMIC-Imphal West-II dangi anir oa pa police ket nung November 14 tashi ayutsü temelaba agütsü.
Indian Penal Code nung Arrlatem- 505(1)(b)(c)/ 505(2)/506(a)(b)/507 kübok pa anema tai tongloktsüogo aser video prokshiba nisung ana police-i pua lir.