Manipur Education department-i aitsür

Imphal, April 26 (Agencies): Manipur nung Catholic Educational Society-i lapokba school tem bomb amshia amokmerenba atema Manipur Department of Education-i khukua aitsüba osang metetdaktsü.
Imphal kübok Sangaiprou tesem nung aliba Little Flower School anasa telungpur telok kati grenade 2 yuja aliba anguba sülen anogo ana lir Department of Education-i iba osang metetdaktsü.
Catholic society-i lapokba school tem nung kaketshir meyirjang aika azünger aser iba ama inyakyim ya kanga majung lir, ta Director of Education (S) Th. Kirankumar-i ashi.
“Catholic Educational Society-i lapokba school tem nung admission asüba nung timtem kar ajuruba osang angazükogo. Department-i item onük süoki ia reprangtsü” ta Kirankumar-isa ashi.
Bomb yuja amokmerenba sülen Kangleipak Communist Party-Military Council-i iba mapa atema tenüng agia sangdong.
School nung admission asüba maparen nung tanga telungpur telok ka den yaritepa shcool ketdangsertemi parnok tenüng amshiba atema KCPMC-i iba mapa inyak ta ashi.
Taküm küm Little Flower School nung anaben tashi amokmerenogo. February ita nunga school gate anasa IED ka yua aliba angu. Ajisüaka tanü tashi iba mapa ya shirnoki inyak’ar mejangja lir.