Manipur Education Minister-i question paper metentsür

Imphal, February 26 (Agencies): Kaketshirtem dang BJP indang election symbol yanglutsü mesüra taoba prime minister Jawaharlal Nehru-i linük yangerba mapa nung yimya tamajungtem asüngdangba nung kecha aibelen mali ta Manipur Education Minister, Th Radheshyam-i ashi.
Manipur Assembly Session nung Congress MLA Surjakumar Okram-i asüngdangba langzüdang Radheshyam-i ya ashi.
“Kaketshir tajung süaka, parnoki noksaji meyanglutet nungbo marks mangutsü. Parnok nem grace marks agütsütsü asü kokda?” ta MLA Surajkumar-i asüngdang.
“Iba tasüngdangba ana atema kaketshirtem nem grace marks agütsütsüla. Evaluators-i BJP indang election symbol yangluba atema marks koma agütsütsü?” ta paisa asüngdang.
“Ano, Nehru-i linük yangerba mapa inyakba nung yimya tamajung pezüji kechi atema asüngdang?” ta MLA Surajkumar-isa metetnüa asüngdang.
Idangji Education minister Th Radheshyam-i tasüngdangba mezüngjibo melangzü saka pai iba atema asüngdangtepdang tasüngdangba anaprongji syllabus nung dena lir ta jangjatsü, ta ashi.
Kaketshirtemi politics angazüktsüla aser iba ama tasüngdangbatem ya asüngdangtsüla, ta paisa ashi.
Council of Higher Secondary Education of Manipur (COHEM)-i ketdangsüa agiba Class 12 tatidang nung political science kaketshirtem dang Bharatiya Janata Party indang election symbol yanglutsü aser Nehru-i linük yangerba mapa inyakdang yimya tamajung pezü rasa zülutsü asüngdanga liasü.
Iba question paper indang noksa ya social media nung kanga prokshir.