Manipur election metenzük tsüngda IAF-i petroleum osettem bener aru

Imphal, February 23 (Agencies): Indian Air Force (IAF) cargo oil tanker kati Brehostibarnü Imphal-i petroleum osettem bener aruogo. Manipur nung taruba ita election agitsü lir saka lenmang nokdanga ayuba ajanga parnok totzü agi kanga anünger.
Iba totzü abenba tayimtsü 10:30 am shi nung arua atong, aser osettem agizüka toktsür meyipa oadok, ta airport ketdangsertemi metetdaktsü.
Tang agi tanabenbuba IAF cargo oil tanker ajanga Imphal-i petroleum osettem bener arutsü. Mapang telatet ka makai lenmang nokdanga ayuba ajanga ki oset aser tanga tenüngdaktsü osettem den totzü dena belentsü asoshi gari senzüsenpongtsü mesatemer.
Manipur sorkari district tasen 7 tentetba anema yaküm November 1 nü nungi tenzüka Unitet Naga Council-i anir highway tem nokdanga ayu.
March ita assembly election nung ketdangser aser election nung shilem agitsüpurtem senzüsenpongtsü asoshi totzü peria lir, ta Bodhbarnü Election Commission-i metetdaktsü. Tang lenmang nokdanga aliba ajanga election nung kecha timtem majurutsü, ta shisem.