Manipur election mezüng shilem nung candidate 168-i tokteper

Imphal (Manipur), February 19 (Agencies): Manipur Assembly election mezüngbuba shilem, March 4, 2017 nü Assembly constituency 38 nung candidate ajak agi parnok 168-i shilem agia tokteptsü aser parnok rongnung independent candidate 11 lir.
Menden ajak nung toktepba party ji BJP kija lir aser Churachandpur o Kangpokpi constituency na nungbo Congress candidate kata mali.
Saikul constituency nung candidate 11 lir. Churachandpur constituency nungi tokteptsü atema Manipur nung yimtenren nung takoktet, Phungzathang Tonsing nem Congress Party ticket agüja liasü, ajisüaka pai party primary züngsem nungi anena liasü.
Ano Congress ticket nungi metokteptsü atema tribal yimtenren lenir kar nokdanger.
Tribal nungi tetsür MLA, Nemcha Kipgen-ia Congress nungi anena BJP nung denogo. Lai BJP candidate ka ama Kangpokpi constituency nungi tokteptsü.
Manipur People`s Party candidates nem election temaitsü balala ana- petrol pump aser cycle agütsüba ajanga Honibarnü mepetmesü kar adoka liasü.
Manipur People`s Party candidate kar nem petrol pump temaitsü agütsüba sülen parnoki Honibar aonung tesü tashi Chief Election Officer office kima bicycle temaitsü khanga liasü.
Ajisüaka election ketdangsertemi, “Joko temaitsüji memelentettsü. Court nung ken o angadangba sülen Manipur People`s Party ji de recognized ta sangdongogo. Tesülen N. Sovakiran-i aniba telok ka ‘MPP office ketdangpurtem’ ta agizük,” ta metetdaktsü.
Ajisüaka candidate karibo petrol pump temaitsü nung tokteptsüsa akumtsü.
Election ketdangsertemisa, “March 8 nü election tanabuba shilem nung N. Sovakiran densema candidate kar bicycle temaitsü nung tokteptsü atema melatsü,” ta metetdaktsü.
Election ketdangssertemi ashiba agi, “Court nung anünga aliba ken otem atema official inyakyim asoshi mapang mali, ibayongji mezüngbubaren candidates nem petrol pump temaitsü agütsü. Ajisüaka tanüngba candidates nem bicycle temaitsü agütsütsü atemabo mapang adoktsü.”
Item constituency nung election maparen ajak tenzükogo. Party balala nung inyakertem tsüngda raraba osang kar lir aser constituency kar nungbo gari aser kiojen raksatsüba osangtema lir.