Manipur election nung BJP nungi CM candidate mali

Imphal, February 24 (Agencies): Taküm Manipur election nung BJP aser Congress telok kanga sashia tokteptsü lir, saka tang tashi BJP nungi Chief Minister inyaktsü asoshi candidate kata tenüng jateta agüja mali.
“Manipur election nung BJP asoshi Narendra Modi aser pai aniba sorkari len anitsü. Onoki Chief Minister asoshi candidate tenüng kata magütsüba ya Centre nung aliba lenirtemi meteta lir,” ta Manipur nung aliba BJP tir, K Bhabananda Singh-i ashi.
“Assam nunga Congress teloki küm 15 tashi mejungi yimsü asüba sülen BJP sorkar aru. Yamaji Manipur nunga menden asemsü nung anasü-bo BJP-i ngua yimsü asütsü,” ta Singh-i osangbener dang kanga temolung lema ashi.
Manipur nung taoba mapang election agiba mapang, National People’s Party (NPP), Naga People’s Front (NPF) aser Lok Janshakti Party (LJP) teloktem den külemi longjemer shilem agi, saka taküm agitsü aliba election nung BJP kisüng lir.
Manipur Assembly menden 60 asoshi NPP candidate 21, LJP candidate 11 aser NPF candidate 15-i tokteptsü lir.
“Onoka Centre sorkar tentetba NDA nung dena lir, saka regional party tem taginüba aser nükjidong-a balaka lir. Aser BJP kisüngi Manipur nung sorkar akümtsü kanga temolung lemteta lir,” ta NPP nung tongti zülur, Vivek Raj Wangkhem-i ashi.
“BJP-i NPF den rarar ta jembiba ya kecha mali saka nüburtem külakotsür dang lir. United Naga Council (UNC) den BJP dena lir aser state nung UNC-i rongsenkettsüng mokdangba nung BJP dena lir,” ta Congress telok nung tongti zülur, Vidyapati Sejam-i ashi.
Manipur nung Assembly menden 60 asoshi election shilem ana küma lemsar March 4 aser 8 nung agitsü lir.