Manipur election nung NSCN-IM Framework agreement indang jembir

Guwahati, Feb.16 : Taruba ita nung Manipur state nung assembly election agitsü atema tang nüboyimba mapang lir aser iba election nung jembiba tongtibang onük kaji center sorkar o NSCN-IM na tsüngda “framework agreement” yangluba dak aketba onük indang asütsü.
All Manipur Students’ Union (AMSU)-ia center aser NSCN-M na tsüngda ‘framework agreement’ nung kechi onük renema ali, ibaji jungkai adoka metetdaktsütsüla ta takangba agütsüba sentong ka tenzükogo.
AMSU teloki Manipur nunger otsü aser parnok yimten temeten wazüka ayutsü asoshi jembiba sentong ka tenzükogo, kechiyong parnoki NSCN-IM telok den center sorkari yanglua akaba ‘framework agreement’ jagi timtem agütsütsü amai bilemer.
Tang election mapang ya Manipur nung yimten telok ajaki center sorkar dang NSCN-IM den yangluba ‘framework agreement’ nung kechisa shia lir, item ajakji yimjak nung metetdakjang ta akangtsüla ta AMSU nung tongti zülur, Wb.Manjit Sarengthem-i metetdaktsü.
Ajisüaka, BJP lenir, O Joy Singh-i ashiba agi, NSCN-IM den yangluba “framework agreement” nungji Manipur artsü yanglushitsüsa kecha shia mali. Iba agreement nungji kodangsa Naga yimten tebilemtsü ya telemtetba kati arutsüsa telemtetba ka agitsü südir, idangji kidanger state-tem Assam, Arunachal Pradesh aser Manipur den asüngdangtepa renemtsü ta shia lir, ta paisa ashi.
Iba ‘agreement’ nung onük asem dang lir aser itemji Center-i Naga nunger otsü ya khenyongi balakata ta angateta inyaktsü, India yimten nüjisoji nübortem dak dang keta lir aser kodangsa ken o renemdir itemji India inyakyim nung melenshitepa yanglutsü ta dang shia lir ta BJP lenirisa ashi.
Ajisüaka, Congress lenir Joykisan-ibo NSCN-IM den renemba ‘Framework Agreement’ nübortem dang mesayubaji center-i nübortem ashioktsüba mapa ka dang lir ta aija metetdaktsü.
Ato kilonser, Narendra Modi election mapang Manipur-i arura pai NSCN-IM den renemba agreement nungji Manipur akoksatsüsa kecha renema mali ta shitettsüla ta Chief Minister Okram Ibobi-i tawato metetdaktsüogo.
NSCN-IM teloki Naga nunger lushi ajak yimten yimsüsüba ka kübok longjemer Nagalim ta janer. Naga nunger lushi tang aliba Nagaland state nung dang masü saka Assam, Manipur, Arunachal Pradesh aser Myanmar nung tulubalenka lir.