Manipur elections nung rongsenren mokdangba ajanga timtem majurutsü : CEC

Imphal, February 22 (Agencies) : Manipur nung rongsenren mokdangba ajanga assembly elections nung timtem majurutsü aser elections tiptema agitsü atema maparen inyakogo, ta Election Commission-i metetdaktsü.
“State election ketdangsertem dang nungi onoki osang ajak nguogo. Manipur nung assembly elections nung rongsenren mokdang ajanga timtem kecha majurutsü. State sorkaria ibaji onok dang nangzükogo” ta Chief Election Commissioner, Nasim Zaidi-i osangbener dang ashi.
Election ketdangsertem aser security nisungtem Election Commission-i komaser timtem majurui senzüdaktsütsü ta osangbenertemi asüngdangdang, “Onoki district aser state ketdangsertem den tensa kanga junga repranshimogo. Election dak sendakba maparen atema petrol, diesel peria dang lir. Iba atema tebilemtsü kecha mali aser election ketdangsertemi onok den yariteptsü” ta Zaidi-i langzü.
Manipur nung election agidang Central police force tem peria mapa lemzüktsütsü aser polling station shia nung Central police forces-i nüka mittsü, ta paisa ashi.
Zaidi-isa ashiba agi, general 20 aser election dak sendakba police observers 20, expenditure observers 20 aser awareness observers 7 tashi election dak sendakba maparen ketdangsüa reprangtsü atema mapa lemzüktsüogo.