Manipur ghonda 48 mokdanger

Imphal, May 05 (Agencies): April 26, 2016 nü nisung ka alenseta sür anguba atema ochi temeten takhangba agüja ghonda 48 state mokdangba ajanga state nüburtem libaliro mejungi kongshiogo, ta Brihostibarnü ketdangsertemi ashi.
Imphal West district kübok Kakwa  aser Thoubal district kübok Lilong nung Joint Action Committees nati United Committee Manipur aser All Manipur United Clubs Organisation na den longjemer state tesem ajak mokdang.
April 26 nü Thoubal district kübok Lilong nung Sagolshem Prasanta tasümang angu, aser Bodhbar ayaterm nungi tenzüka state tesem ajak mokdangogo.
Brihostibarnü lungkak aiter kari gari balala aika indang aina jaksatsü.
Lungkak aitertemi ashiba agi, Chief Minister, Okram Ibobi Singh-i autopsy report osang lemsateptsü memelungba ajanga parnoki lungkak aita mokdangtsü lemtet.
Tanü Imphal nung shisaliok rejutem, totzü inokdak aser shishilembaba tesem ajak shibangba den külemi yimti yimdong nung gari mesenzü, ajisüaka tezülen aliba tesem kar nungbo shishilembaba tesem lapoka liasü.