Manipur high court-i state sorkar nem tetuyuba agütsü

Imphal, February 9 (Agencies): Mongolbarnü Manipur high court-i state sorkar dang United Naga Council (UNC) mendenpur, par 8 February 16 matongdang court-i anir arutsü tetuyuba agütsü. UNC-i anir National highway 2 nokdanga ayuba ken o nung telemtetba agütsüdang iba tetuyuba agütsü. Lemang nokdanger Mongolbarnü anogo 100 jungogo. UNC nung ketdangpur 2; tir Gaidon Kamei aser information secretary SK Stephen na iba dak sendakba ken o nung pua lir.
High court-i maneni DGP LM Khaute aser Indian Oil Corporation (IOC) ketdangsertem dang state nung totzü belenba osang tejangja agütsütsü asoshi metetdaktsü.
UNC-i maneni lenmang nokdanga ayutsü asoshi lemtetba sülen, HC-i anogo ka lir iba teteyuba agütsü. State nung Election Commission of India (ECI)-i joko election nung sendakba maparentem inyak tenzükogo. Mongolbarnü ECI-i mezüngbuba shilem nung election agitsüba constituency 38 atema osang ka metetdaktsüogo.
Union home ministry joint secretary (northeast in charge) Satyendra Garg-i, Okram Ibobi Singh-i aniba Congress sorkar, aser UNC na tsüngda angatettepa jembishinüdaktsütsü asoshi Imphal semdang. Osang ajanga ashiba agi Garg-i iba ken o tembangdaktsütsü nükjidong nung UNC lenirtem den ajurutep.
Mongolbarnü Additional chief secretary (home) Suresh Babu-i iba dak sendakba ken o nung kecha terenlok mali, ta osangbenertem dang ashi.
Manipur sorkari UNC pur dang lenmang nokdangba sentong ken reprangshitsü asoshi mepishi, kechiyong iba ajanga Manipur lenden aser tenem nung alirtem ajak kangshir.
Maneni February 3 nü Delhi nung lokti asem senden nung tangatettep kati arubaji metsüngareta agizüktsü asoshi mepishi.
State chief secretary Oinam Nabakishore Singh-i ashiba agi, lokti asem senden nung MHA, Manipur sorkar aser UNC nungi shilem agirtemi iba ken o dak sendakba nung kulizüngtepba ka agiogo. Iba nung Manipur nung district tasen 8 akümtsüba ken o taruba senden nung jembitsü lemtetogo.