Manipur-i benokba bill asem magizük

New Delhi/Imphal, June 7 (Agencies) : Manipur-i anti-migrant bill asem benokba temzüng ozüng mongintemi ano khen asadanga reprangshir külen telemtetba tasen kati arutsü. Iba telemtetba ya Manipur Chief Minister Okram Ibobi Singh-i anir telok ka Union Home Minister Rajnath Singh den senden ka amendang agiba lir.
Manipur Assembly-i August 31, 2015 nü benokba bill asem ya kechiba magizükar ibaji Manipur nungi atuba yimsüsürtem dang Rajnath Singh-i angateta shiogo.
Temzüng ozüng mongintemi item bill ano khen kanga junga asadanga reprangshitsü, ta Rajnath den senden amenba sülen yimsüsürtem aser Ibobi Singh nungeri sangdong ka ajanga metetdaktsü.
Sangdong nung, “Home Minister den Mongulbarnü gondha ka senden amenba mapang onoki nisung 18 dena liasü,” ta shia lir.
Manipur-i benokba bill temji Manipur Land Reforms & Land Revenue (7th Amendment) Bill, 2015; Manipur Shops & Establishment (2nd Amendment) Bill, 2015; aser Manipur Protection of Peoples Bill, 2015 tem lir.
Mongintemi telatetba tajung kati arutsü atema bill mezüngbuba anaji kanga junga reprangshitsü. Bill tasembubaji legal aser temzüng ozüng mongintemi tanaben reprangshia state den peta telatetba tasen ka küma yanglushitsü.
State nung tebilemtsü onsara adokba ajanga nüburtem dang yimjung nung alitsü atema iba sangdong ajanga temepishiba ka sangoktsüogo.
Yaküm nungi Manipur nung bill tapu balala atema yimya balala nung longkak aityonga arur.